數嚇數嚇，由TF1陪住柯柏文（Optimus Prime）到地球嘅嘅博派兄弟，令大家最有印象，仲嗌到出個名嘅就好似淨番大黃蜂（Bumblebee），其餘嘅爵士（Jazz）、力捷（Ratchet）與鐵皮（Ironhide）等老朋友早就英勇殉職，相信嚟緊嘅TF5一定有唔少博派新角色加入，否則又點夠狂派打？好彩喺玩具世界方麵，博派唔再勢孤力弱，搶先喺TF5上畫前開售嘅「孩記」Hasbro第一波新品，當中包括Voyager Class與Deluxe Class兩大主打係列合共六款角色，博、狂兩派嘅比例係2:1，各位博派粉絲總算有啲安慰吧！
先講檔次較高嘅Voyager Class，兩款都係博派要角，分別係「文哥」與鋼鎖（Grimlock）。柯柏文嘅造型比TF4嘅Leader Class順眼好多，最明顯係背脊唔再孭住龜殼咁款，身形比例都更加「似返個人」，另有兩點更加抵讚，其一係可動性有顯顯改善，尤其是肩關節可以大幅度前移，令文哥可以擺出唔同嘅揮劍動作，唔似TF4得個企字；塗裝方麵同樣攞高分，麵容、胸膛與四肢嘅上色都有金屬感，加埋精細塗裝，若然劍、盾都有同等質素嘅塗裝，唔好咁重膠味嘅話，咁就完美了！
同樣係博派中人嘅Voyager Class鋼鎖，基本設計源自TF4嘅同係版本，不過顏色改用灰、褐、銀等沉色係列，對應TF5涉及嘅中世紀武士橋段，留意機械人頭部嘅鋼盔形輪廓，加埋鋼鎖本身嘅霸氣造型，與呢款TF5新配色真係Match得好緊要。不過同係文哥出現嘅問題，亦都喺鋼鎖身上重要，甚至更嚴重，就係狼牙棒零塗裝示人，嘥咗呢件咁有分量嘅重型武器。
剩低嘅四款新品全屬Deluxe Class，博派方麵有大黃蜂與閃光（Slash），以及狂派嘅路障（Barricade）與狂戰士（Berserker）。先講博派，大黃蜂嘅設計源自TF4嘅同係版本，雖然Deluxe Class隻屬中檔級別，不過頭部上蓋都可向下移位，變成戰鬥造型，右手掌可以翩轉轉成激光炮，至於TF5嘅改動之處，在於汽車形態2014 Chevrolet Camaro Concept嘅塗裝，TF4由車頂去到頭冚嘅粗身黑色直間拉花唔見咗，而整幅頭冚變做黑色，模仿實物嘅碳纖質感，再要留意車身嘅黃色部分，明顯比TF4淺色咗，更加接近實物嘅外觀。作為大黃蜂戰友嘅閃光，機械人形態似乎唔夠霸氣，不過變成棘龍就生猛番曬，全身布滿角位，而且四肢可動性高，又可張開大口，相信喺電影中嘅造型都唔會令人失望啩。
對老變鐵粉嚟講，一定唔會對路障感到陌生，事關TF1初段已經出場，今次回歸用咗全新設計，第二形態依然係Ford Mustang Saleen警車，驚喜唔大，真正抵讚係機械人形態，TF1嘅造型係手長腳長，似猩猩多過似人，TF5就變成大隻佬，唔通路障唔見咗一排，專登去做Gym操肌？唔隻型咗，路障仲大咗殺傷力，事關前臂可以套上格林式機關炮，又有警棍傍身，再度突顯佢嘅「慈母」身份。同係嘅另一奸角狂戰士，真心講，佢嘅Chevrolet Suburban形態平平無奇，反而機械人就令人眼前一亮，鬼麵罩頭雕加上披頭散髮，果然狂態盡現，小編仲覺得有幾分似Predator，加上手指與腳趾呈爪形設計，更加展現出角色嘅兇悍一麵，惡得咁緊要，一眾博派朋友要小心了。
除了以上嘅Hasbro新品，日本品牌Prime 1 Studio亦有老變新品發布，雖然冇變形Gimmick，但係以巨形、精雕細琢加舊化塗裝做賣點，佢就係有成93cm高嘅震波（Shockwave）雕像。震波喺TF3出盡風頭，差啲KO文哥，最大特色就係有「鑽洞獸」（Driller）跟身，後者成條金屬大蟒蛇，呢款雕像亦都傳神還原，而且震波嘅獨眼與炮口都有LED發光功能，更顯氣勢。咁大部，造工又咁講究，售價當然非比尋常，官方所定嘅建議零售價為292,000日圓，全球限量888套，預計明年6至8月派貨。
原文地址：http://hk.on.cc/hk/bkn/cnt/lifestyle/20170517/bkn-20170517140036686-0517_00982_001.html
